Maxine denkt

2008-03-18T09:34:00.008+01:00

2008-03-17T16:29:00.011+01:00

Isch du mehr selber leed...

2007-06-09T20:42:00.001+02:00

sagen ä mol , kenner ach so leid die sich immer selber leed tun?

do werd gejammert, geheilt was de zeig hält fer nix un wieder nix. hauptsach im eigenen net vorhandene leid konn sich geaalt werre vor lauder glick
oftmals is des wie än schlag ins gesicht gehts dem zuherer meischt viel schleschder als dem jammerbeidel
was nitzt des? nix! do werrscht verrickt.
der konn jo net zuhere weil man is jo sooooooo mit soim elend beschäftischd, gonz schä eidel

und wie groß is des elend, net zu ermesse
des jammert er soine freunde vor
hot nen gude job, kä geldsorge, ä nettes dahäm awwer is jo soooooooo alläääääääää,meine Fresse
do kriegscht ä kohleohr.

An monsch Dage!

2007-06-09T20:03:00.000+02:00

was bischt an monsche dage
so genervt
dir schmerzt schun de mage!

jeder dolle hot der was zu berischde,
erinnert disch on doi pflischde
fer disch interessiert sisch kä sau
bischd jo a nur die hausfrau.

hoscht gekocht un gebrutzelt
de alt stochert drin rum als wärs verhutzelt
oder sollts mol ogenehm soi
frissts ers noi wie ein schwoin.

fers wochenend hoscht gewienert und gebutzt
ratz fatz is des mit de gardeschuh wieder verschmutzt
selbst schuld bischde donn
sagt der doin ehemonn.

doi wäschekorb is niemals leer
des werd mehr und mehr
du wäscht und biegelscht ohne zu mocke
trotzdem fehlen andauernd socke.

und kummschde mol naus
duscht singe und danze gehscht aus der raus
des gonze mol ohne stress
zieht de oll ä fress

an monsch dage
fallt der wieder oi
´s war schä alloi zu soi.

so mied

2007-05-23T20:37:00.000+02:00

sachen ä mo kennen ner des das ner zum umfalle mied seid un gott und die welt will noch was vun eisch?

du bischt zum umfalle mied
und ziehscht der grad noi ä geiles lied
es gonz johr ruf kenner oh
aber do.

donn hoschde de herer in den hond
bischt gedanlisch in nem ferne lond
aber ohne ricksicht bekummschde ä ohr gekaut
und de rescht vum dag versaut.

noch 45 minude bischde informiert
iwwer alles was disch net intressiert
awwer fer gude freunde duschde des gern
ach wenn de wollscht ä bissel mugge hern.

nu bischde mieder als zuvor
hoscht awwer immer noch de herer am ohr
um des gonze besser zu ertrache
saufschd nebebei ä bier uf nischderne mache.

entschpannung tritt oi un du herscht weider zu
findscht dobei doi inneri ruh
de onner hot der noch viel zu erzähle
awwer noch ä bissel mehr pegel und der konn disch nimmi quele.

donn legt der endlisch uff und du dengscht so bei dir
des war awwer schnell ich hab noch 3 bier.
du schmeischt disch uf´s sofa und bischt so froh
do bimmelst erneit und doi mudder is dro.

nu griegschde die news vun unkel und tante
un natierlisch dem rescht der verwande
doi schweschder is schwonger , de hund ist kronk
hilft nur äns än weitre gong zum kiehlschronk

noch´m 4de ohruf is de kaschde leer
ohrufe konn heit kenner mehr
du fallscht in doi bett und machschd die age zu
endlich, endlisch doi ruh.

pälzerhochzeid

2007-05-23T11:06:00.000+02:00

am sunndach wars donn so weit än freund dennsch nu schun 17 johr kenn kam unner die haub. wer hätt des noch gedenkt?

un wie des so is fongt des problem jo schun beim thma was zieh isch den o? o. obwohl ma jo des woche vorher gewisst hot wars jo net mäglisch noch ä diät zu schtarde, wie a wenn biergardewedder is und des biersche so gut schmegt? also werd des klene schwarze wiedder in de schronk gehängt un ach des rosa ballkled scheint doch ä bissel iwwerdresst bleibt jo nur des große schwarze marke hauszelt...astroi passt.

gescheides friesierle muss nu ach soi also ab zum frieser und sich mol 100 nadle in den kopp pieke losse, passt a.

bleibt noch des thema was fer schuh? die birkeschtock scheinen jo net ganz passend zu soi ala quetscht ma soi fieß in ä paar hochhaggische pumps mit riemsche die die melonefießscher in form quetsche. ( blasepfläschderle is in de honddasch)

so konns gehe nu aber zack, geht bald los un ma will jo net zu schpät kumme.

noch 2 schdunne kersch werd erscht mol de dorscht geschtillt am sekt empfong, leider ohne schorle gläser so das man genetischt werd sisch schtänisch ozuschtelle.

noch´m offizielle teil mit kuchebüffe gehts in de gemietlische teil iwwer, un gemietlisch heßt das gerockt werd bis de arzt kummt de bräutigam gibt cocain vum erisch klapperstuhl zum beschde do sitzt schun käner mehr uff´m schtuhl nu kummen ah noch die annonymegiddarischde nu sitzt käner mehr , aua moi fieß... un noch 2 gläser woi bin sogar isch uf den tanzfläsch statt walzer werd gerockt und gsunge des nennsch ä party. isch hab donn noch die meglischkeit mit einem der anonymegiddarischde ( mit de prominenz) zu danze un um kä name zu nenne joe cocker hätts net besser gekennt.

moins um 6 werd vun woische uf wodkaschorle umgestellt und um 7 geh isch mit moine extrem rambonierte fieß gliecklisch häm, was ä feschd. un gelernt hab isch a was es gibt ä kronkheit die heßt unnerschorle un bevor isch dodrunner leid her isch nu uff und sach ä mo proscht!

2007-01-05T11:24:00.000+01:00

Unser Babys

Körper

2006-10-21T19:35:00.000+02:00

des gonz soll zur kollasch werre, in verschiedene variante.

Frauen zu heiraten und zum Poppen

2006-10-20T18:03:00.000+02:00

tja
fällt mer de satz vun re freundin oi,

"mit mer wollen die männer ins bett, disch wollen se heirade"

hmmmmmmm was sagt mer des? isch seh so scheiße aus, dass de mann der mit mich will auf jeden fall misch liebe muss, sunscht tut er sich des net an?

odder moi freundin ist so dämlich das se eben nur zum poppen zu gebrauchen is..wie heßt so schä dumm...na ihr wisst schun.

gebts den typ fra, mit dem mann nur ins bett will? un wie ist dann de andere typ? verkärpert er das typische mudder, geborgeheits, isch back der än kuche bild?

uf de annere seid wollen mer frae jo a än macho im bett und än softi als mann, der dozu natierlisch intelligent, humorvoll, tierlieb un in moinem fall doch bitte hoor uf de bruscht hot.*g*

ultimativ is do natierlisch der zum im bett macho mutierende softi, natierlisch nachdem er dich 3h gekrault hot.

abba was issn de kehrschluss dozu? de vamp mit de kischeschärz?

Kunscht odder Pervers?

2006-10-20T11:30:00.000+02:00

hmmmmmmmm ..und widder sowas, woriwwer isch mer gedanke mach...

ä gude freundin von mir ist künstlerin, die schun in new york ausgestellt und dort ach bilder verkaft hot.
moi kinstlerischi ader mag oingeschränkt soi, abba die arwet mit materialen, farwe un änre loiwand empfind isch als inneri befreiung.
nu mescht besagti freundin un isch ä projekt "kärper un hund schtarte" was heßt black/white teilakt im middelpunkt jedoch den hund durch än mittisch ogesetze rahme in szene g´setzt.

leider hot moi familie druf net sunderlisch positiv reagiert, "des is doch pervers" , gut den abdruck der vagina ( nicht meiner) uf de kollasch wurd jo vun einige als äscht schäni tulp wahrgenumme, klar des do än nackte riegge mit hund oindeutisch pervers is, gell.

misch faziniert dieser gedonk , die roinheit und sinnlischkeit die so ä bild ausdriecke muss, abber wenns den äscht so pervers is, donn werd isch wohl moin blanken popes uf ä loiwand hocke un tulpe produziere.

Tussi mit Abitur

2006-10-19T22:38:00.000+02:00

sooooooooooooo in onbetracht moiner fähischkeit zu denke un schnell zu schreibe bidde ä bissel nachsischt, gell..

lescht woche kamsch in de genuß äm profifußballer die füßsche zu mache un wie es sich so ergibt kummt ma ins geschpräsch.

aha de gude hot also gerade soi abi gemacht und schtudiert nu...dunnerwedder...
isch erfahre das so nen easy job wie ich ihn habe, er mänt aus ledierte fieß was osehnlisches zu mache, 6h in re nagelmodellasche zu stecke hoch kunzentriert um ebe soi kinstlerische ader aus zu lebe, jaaaaaaaa domit hab isch jo des große los gezoge.
ne is klar....

und ich mache natirlich jo nach 3x die 7te klass hauptschul nun doch des große geld...feurio..was binsch froh des nu zu erfahre, net nur wegen dem geld, sundern auch wege dem hauptschulabgangszeugnis...

und während isch misch so an soim pes valgo-excavatus mit 5cm hornhaut zu schaffe mach , denk isch scheiße mit doim 1,2er abi un dem abgeschlossene schdudium hättscht nun escht was onnderes machen kenne als 19 jährigen scheißern die fieß zu rischde...un des skalpell wird sisch gern ä ideesche tiefer bohre als erlaubt, aber man ist jo än unner oligophrenie leidender profi....but who cares es macht schpaß..gell

Freundschaften zwischen Männer und Frauen?

2006-10-19T15:47:00.000+02:00

also irgendwie geht mer des in letzter zeit net mehr aus´m kopp...gebts freundschafte zwische männern und frae?

odda isses wie vun einige ongenumme wierklisch so, dass männer nur mit frae befreudet sin um die zu poppen?
odder geht ä freundschaft donn nur bis zu re beschtimmte grenz un schlogt donn in mehr um? odder eben werklisch wenischer...

was heßt des donn? das wenn moin bester freund mer zuhert er dobei nur de gedanken hegt wie bekommsch die fra inne kischt?
odder isses vielmehr so , dass man soi gefihle permanent unnerdrickt um "freunde" zu soi... un es ebe net um die kischt geht, was jo wiedderrum heße det man misst nur soin beschde freund heirade zack hätt ma die groß lieb.

odder es gebt ebe diese freundschafte, donn wäre moi ledschde gedonken ma schä fern arsch gewese.
gottsche wie verwirrend

Lilli Schwanger?

2006-10-19T12:10:00.000+02:00

Feurio, was binsch aufgeregt

ist moi klänie Lilli schwonger?

am 5 november werdsch des erfahre, do werdsch moi drei monschder ausstelle un se untersuche losse.

Jeans

2006-10-19T11:48:00.000+02:00

Des is jetz a mol was, was isch lo werre muss.

wollt isch doch am wochenend ma nen ründsche shoppe geh um mir mo ä paar naie jeans zu kafe.

isch also noi in de ultimative jeanslade , mir ä paar jeans geschnappt in greß m, was bis dato imma sehr logger und bequem gesesse hot. wosch doch 36-38 trag .

in de umkleidekabien dann des große erwache, lecko die bekommsch net mo iwwer die hift.
das fra sisch do unweigerlisch mo gedange macht , " binsch fett gewore?, hoschd ä gebärdefreudisches begge?" is ja mo logisch.

3 paar jeans ogezoge , nix zu wolle sah aus wie die worscht in de pell.

zugenumme habsch net in den letzte johre, also woran liegts?

nebendro in de umkleid tweegys halb schwester , die ohne probleme in die jeans (an der stoffmäßisch sehr gespart werd , zum doppelte preis versteht sich... halbe arsch schaut raus ) nunja die passt natürlich super noi.

massiver fruschd macht sisch breit un als isch donn in de wirre des ladens jeans in greß null find ists gonz aus.

NULL!!! wer soll do noi passe? än embryo? äny die sisch bei re schreib knäcke tierisch ufgebläht fiehlt? nä also.....escht...

aus fruschd habsch gar käni gekaft un bin häm erscht mo moin bmi bereschne losse...so bmi vun 20,6 und domit zu fett fer die jeans vun heit. :-(( super.

do schtelld sisch mer doch escht die frog , will mann des? wollts ihr frae die aussehen wie än guppy inne schwangerschaft so durchsischtisch? un wenn man donn so gespräsche mit null hosenträgerinne belauscht , muss ma doch feschtstelle das mit schwindender hosengreß prozentual ach die hirnmass abnimmt.

so ich glab isch werf mer hait ä rumpsteak noi, blutisch ;-)

Tussi oder net Tussi?

2006-03-31T08:59:00.000+02:00

voller elan binsch ja on die ausbildung zur nagelmodellistin gegonge, was mer ...wer hätt des gedenkt..nen heiden schpaß macht.

um des ganze zu ibe brauchts , wie kännts onerscht soin freiwillige opfer die sich die näschel machen losse. do denkt ma jo ach kä problem , schnappsch mir meine freundinne..allesamt eher natirlich wirkende damen ( ums mo so zu sache) ..pföchen immer rattenkurz, nachellack kenne ma jo nur aus de werbung un es soll unter den hier ogeschprochene tatsächlich welche geben die mit der normale nachelfeil ihr fingernägel foltern.

also isch will in moiner großmut den damen zu schänschde pfötchen verhelfe un was muss ich here? " des machen doch nur tussis" mäschd an der stell mo betone es war nie die red vun 6cm longe kralle, die es der träscherin unmäglisch macht sich selbst de popes zu wische..

TUSSIS

heiligskanonenrohr, eine fer misch naie erkenntniss, wenn isch also kä tussi soin will knabber isch moi pfoten korz und feile sie schä ausgefranst und um gonz sischer zu gehe verwerfe isch sämtlische kosmetik und parfüms die so in moim bad schtehn..odder wie???
nu sitze isch hier und frog misch unnerwerf isch misch dem grubbenzwong kä tussi zu soi?

aber ich schätz ich bleibe bei moiner linie, denn sunschd renn isch demnägst dursch de wald und sammel kräuter und mach ä eigenurintherapie.

in diesem sinne ..allen tussis än schäne tag, gell.

ok sooo nich!

2006-03-30T11:52:00.000+02:00

also so langsam habsch die faxen ja dicke, gell. nu habe ich drei tolle hunde an denen ich ja viel spaß hab, aaaaaaaaaber die neuste marotte meiner drei: wir pieseln an und unter frauchens arbeitstisch.... da fragt man sich doch : jaaaaaaaaaaa gehts noch

ich wollte gestern mal in einem zoofachhandel mich schlau machen. was ich da noch so tun kann.. der nette verkäufer: ach das so ihre hunde markieren...das ihr revier!
schock schwere not, darauf wäre ich jetzt nu net gekomme! ....un überhaupt macht der witze? das mein haus und ich piesel auch nicht unter und an den arbeitstisch! aber wenn das so ist werdsch wohl andere seiten auf ziehen müssen hier... bissel unfair ist allerdings das ich mein beinchen net so hebe kann wie mein rüde, aber pah denen geb ichs hab natürlich glei was gefunne was mer hilft des problemsche zu löse..

so und nu können se was erlebe..ich gehe basteln..

alla gut

2006-03-30T11:27:00.000+02:00

ok, das nu mal mein erster testeintrag..und in anbetracht dessen das das wetter hier in der pfalz so schlecht ist, denke ich es werden heute noch einige "sinnvollere" folgen...